ईद–उल–फित्र पर्वको शुभकामना

Ed shubhakamana letter head.pdf :To download file click here

नेपाल बहुजातीय, बहुभाषिक, बहुधार्मिक, बहुसांस्कृतिक तथा भौगोलिक विविधता भित्र एकता भएको राष्ट्र हो । जीवनका हरेक क्षणहरू आनन्द अनि स्वतन्त्र रूपले जिउन सिकाउनका लागि वर्षभरीका चाडपर्वहरूले सभ्य संस्कृति सम्प्रेषण गर्दछन् । हरेक चाडपर्वहरूसँग जोडिएका किंवदन्ती, मिथक एवम् पौराणिक कथाहरूले हाम्रो जीवन सुखी र हितकर बनाउने सन्देश दिने गरेको छ । संस्कृतिलाई जीवन्त राख्ने माध्यम नै चाडपर्वहरू हुन् ।  

ईद–उल–फित्र इस्लाम धर्मावलम्बीहरूको महत्वपूर्ण एवम् पवित्र पर्व हो । ईद–उल–फित्र पर्व मुस्लिम समुदायले हर्षोल्लासकासाथ रमजान महिनाको समाप्तिको सङ्केत स्वरूप मनाउने गर्दछन् । रमजानको समयावधिमा प्रत्येक दिन बिहानदेखि साँझ सुर्यास्तसम्म रोजा (उपवास) राख्ने गरिन्छ । यस अवधिमा रोजा खोलेर परिवार तथा इष्टमित्रसँग रमाइलो गर्ने, आफ्नो गक्षअनुसार दक्षिणा दिने पनि चलन छ । । ईदको दिन नुहाएर सफा र पवित्र भएर खुला मैदानमा पुगेर ईदको नमाज पढ्ने गरिन्छ । नमाज समर्पण गरिसकेपछि ठूला बडाबाट आशिर्वाद लिने गरिन्छ । नेपाल बहुधार्मिक देश भएकाले धार्मिक सहिष्णुता र धार्मिक समानतालाई हरनेपालीहरूले अवलम्बन गर्नु पर्दछ । हरेक पर्वले सम्बन्धित समुदायको धार्मिक एवम् सांस्कृतिक दृष्टिकोणबाट सद्भाव र राष्ट्रिय एकताको सन्देश सम्प्रेषण गर्दछ । यस पर्वले नेपालीहरू बीच धार्मिक, सामाजिक एवम् सांस्कृतिक विविधता भित्रको एकतालाई थप सबल र सुदृढ बनाएको छ ।

हरेक समुदायका पर्वको संरक्षण, संवर्द्धन, प्रवर्द्धन तथा पुस्तान्तरणका लागि नेपाल सरकारको संस्कृति सम्बन्धी ज्येष्ठ निकाय सांस्कृतिक संस्थान सदा प्रतिबद्ध छ । यस पर्वले नेपालीहरू बीच आपसी सद्भाव तथा राष्ट्रिय एकताको भावना अभिवृद्धि गर्न सकोस् भन्ने शुभेच्छा सहित ईद–उल–फित्र पर्र्व २०८१ को शुभकामना व्यक्त गर्दछु ।

१८ चैत २०८१                                                    किरण बाबु पुन
ने.सं. १४४५ चौलाथ्व द्वितीया                                  महाप्रबन्धक